Óskemende eki jańa kópir salynady

ASTANA. KAZINFORM — Óskemende Ertis jáne Úlbi ózenderinen ótetin eki kópir salynady. Al keler jyldan bastap Úlbi ózeni arqyly ótetin apatty jaǵdaıdaǵy kópirdi rekonstrýktsııalaý bastalady.

Bul týraly ShQO ákimi Nurymbet Saqtaǵanov Astanada óńirdiń áleýmettik-ekonomıkalyq damýy týraly esebinde aıtty.

Búginde Shyǵys Qazaqstanda kólik, kommýnaldyq jáne energetıkalyq júıeleri kezeń-kezeńimen jańartylyp, logıstıkany jeńildetetin zamanaýı ınfraqurylym qalyptasyp keledi.

— Bıyl ShQO-da 856 shaqyrym avtojol jóndeldi. «Taldyqorǵan — Óskemen», «Óskemen — Semeı» jobalary aıaqtaldy, «Óskemen — Rahman qaınarlary», «Qalbataý — Maıqapshaǵaı» baǵyttarynda jumystar jalǵasyp jatyr, — dedi N. Saqtaǵanov Ortalyq kommýnıkatsııalar qyzmetinde.

Kólik ınfraqurylymyn keshendi damytý úshin Óskemende eki jolaıryqtyń qurylysy júrip jatyr. Bul kólik keptelisin azaıtyp, joldardyń ótkizý qabiletin arttyrýǵa múmkindik beredi.

— Budan bólek, Óskemende Ertis jáne Úlbi ózenderinen ótetin eki kópir salynady. Bul da kólik baılanysyn jáne tranzıttik áleýetti jaqsartýǵa jol ashady. Keler jyldan bastap Úbi ózeni arqyly ótetin apatty jaǵdaıdaǵy kópirdi rekonstrýktsııalaý bastalady. Ol Óskemen — Shemonaıha — RF shekarasy baǵytynyń bir bóligi bolady, — dedi ShQO ákimi.

Sonymen birge, oblysta eki jańa áýejaı salynyp jatyr, «Maıqapshaǵaı» jáne «Úlbi» ótkizý pýnktteri, 5 temirjol vokzaly jańǵyrtylyp jatyr.

Byltyrdan beri Óskemennen Máskeý men Novosıbırskige halyqaralyq áýe reısteri qatynaıdy. Kelesi jyldan bastap Qytaıǵa áýe reısin ashý josparlanyp otyr.
«Óskemen — Almaty» baǵytynda «Talgo» temirjol marshrýtyn iske qosýǵa daıyndyq júrip jatyr.

Aıta keteıik, Shyǵys Qazaqstan týrızmi tórt baǵytta damıdy jáne taý shańǵysyna arnalǵan jańa kýrorttyq nysandar salynady. 

Sonymen birge, óskemendik kásiporyn Eýropanyń 27 eline bal jetkizý múmkindigin aldy.