Óskemende durys tamaqtanýǵa aqsha tólegender assyz qalyp, sotqa júgindi
ASTANA. KAZINFORM — Shyǵys Qazaqstan oblysynda 21 turǵyn taǵamǵa aldyn ala tólegen qarjysyn qaıtaryp alatyn boldy. Kásipker tapsyrystardy biraz ýaqyt jetkizgenimen, keıin qyzmetin toqtatqan. Endi ol tutynýshylarǵa ósimpuldy qosa eseptegende 3,6 mln teńgeden astam qarjy qaıtarady.
Óńir turǵyndary jeke kásipkermen daıyn taǵam jıynǵyn jetkizý týraly kelisimshart jasasyp, qyzmet aqysyn tolyq tólegen. Alǵashqy kezde tapsyrystar ýaqytynda jetkizilip otyrǵan. Alaıda keıin kásipker jetkizý qyzmetin toqtatqan.
Soǵan qaramastan klıentter paıdalanylmaǵan taǵam jıyntyqtary úshin tólegen aqshasyn qaıtara almaǵan. Olar máseleni aldymen kásipkermen ózderi sheshýge tyrysqanymen, nátıjesi bolmaǵan. Osydan keıin birneshe turǵyn Shyǵys Qazaqstan oblysynyń Saýda jáne tutynýshylardyń quqyqtaryn qorǵaý departamentine júgingen.
Vedomstvo basshysynyń orynbasary Andreı Troeglazovtyń aıtýynsha, daýdy sotqa deıin retteý áreketi de nátıje bermegen. Departamenttiń kásipkerge joldaǵan talabyna da jaýap bolmaǵan.
— Zańnamaǵa sáıkes, bir másele boıynsha onnan astam adamnyń quqyǵy buzylǵan jaǵdaıda ýákiletti organ tutynýshylardyń múddesin qorǵaý úshin sotqa júgine alady. Bul jaǵdaıda 21 tutynýshynyń múddesi úshin sotqa talap aryz berildi, — dedi Andreı Troeglazov.
Ujymdyq talap aryzdy Óskemen qalasynyń azamattyq ister jónindegi aýdanaralyq soty qarady.
Sot tutynýshylardyń talaptaryn qanaǵattandyrdy. Jeke kásipkerden 3 mln 55 myń 138 teńge kóleminde materıaldyq shyǵyn óndirildi. Bul — klıentter aldyn ala tólegen, biraq ala almaǵan qyzmetterdiń quny.
Sonymen qatar kásipker tutynýshylardyń talaptaryn oryndaý merzimin buzǵany úshin 611 myń 28 teńge ósimpul tóleýge mindetteldi.
Osylaısha, 21 tutynýshyǵa jalpy 3 mln 666 myń 166 teńge qaıtarylady.
Vedomstvo málimetinshe, tutynýshylardan mundaı sıpattaǵy ótinishter áli de túsip jatyr. Quqyq buzýshylyq anyqtalǵan jaǵdaıda, mamandar tutynýshylardyń quqyqtaryn qalpyna keltirýge, qajet bolǵan jaǵdaıda bul máseleni sot arqyly sheshýge de kómektesýge daıyn.
Aıta keteıik, Túrkistan oblysynda 700-den astam qoǵamdyq tamaqtaný nysanynyń tıisti ruqsat qujaty bolmaǵan.
