Óskemende dúkennen órt shyǵyp, 9 adam evakýatsııalandy
ÓSKEMEN. QazAqparat - Óskemen qalasynda dúken órtendi, dep habarlaıdy QazAqparat tilshisi.
ShQO TJD baspasóz qyzmetiniń málimetine súıensek, kópqabatty turǵyn úıdiń birinshi qabatynda ornalasqan dúken órtengen.
Oqıǵa ornyna jedel jetken órt sóndirýshiler 9 adamdy qaýipsiz jerge kóshirdi. Onyń ishinde 2 bala bar.
«Órt sóndirýshiler jalpy aýdany 4 sharshy metrdi quraǵan tilsiz jaýdy aýyzdyqtady. Qyzyl jalynnyń shyǵý sebebi - jaryqtandyrylǵan sóreniń apattyq rejımde jumys isteýinen bolýy múmkin», - dep habarlady vedomstvo ókilderi.
Osy rette qutqarýshylar obektilerdegi órt qaýipsizdigi talaptaryn qatań saqtaý qajettigin eske salady.
