Óskemende dúkende órt shyǵyp, 30 adam evakýatsııalandy
ShQO Tótenshe jaǵdaılar departamenti baspasóz qyzmetiniń málimetine súıensek, 22 maýsymda tańǵy saǵat 04.40-ta Sátbaev dańǵylyndaǵy azyq-túlik dúkeninde órt boldy.
«Dúken on qabatty turǵyn úıdiń 1-qabatynda ornalasqan. Saýda jabdyqtary men azyq-túlik ónimderi janǵan. Oqıǵa ornyna kelgen TJD qyzmetkerleri baspaldaq arqyly 30 adamdy, onyń ishinde 6 balany evakýatsııalady. 25 sharshy metr alańǵa jaıylǵan tilsiz jaý saǵat 05.40-te sóndirildi», - delingen aqparatta.
Órtten zardap shekken eshkim joq. Jalyndy aýyzdyqtaýǵa jeke quramnan 35 adam jáne 11 tehnıka jumyldyryldy.
Aldyn ala derek boıynsha órttiń shyǵý sebebi – elektr jabdyǵynyń apattyq jumys rejımi nemese elektr jabdyǵyn ornatý men paıdalaný kezinde órt qaýipsizdigi talaptaryn saqtamaýdan bolýy múmkin.
