Óskemende densaýlyq saqtaý mekemeleriniń biri órtendi
ÓSKEMEN. QazAqparat - Óskemen qalasyndaǵy densaýlyq saqtaý mekemeleriniń birinen órt shyqty, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, órt Karl Lıbkneht kóshesinde ornalasqan Reprodýktıvti medıtsına ortalyǵynan shyqqan. Qutqarýshylar birden oqıǵa ornyna attanǵan.
«Órttiń jalpy aýdany 250 sharshy metrdi qurady. Tilsiz jaý saǵat 17.55-te tolyqtaı sóndirildi», - dep habarlady vedomstvo ókilderi.
Aıta keteıik, qutqarýshylar mekemeden bes adamdy evakýatsııalaǵan. Jalyndy aýyzdyqtaýǵa 37 adam men 12 tehnıka jumyldyryldy.
