Óskemende denesin kúıik shalǵan taǵy bir jumysshy Astanaǵa jiberiledi
ÓSKEMEN. KAZINFORM - Óskemen qalasyna «Qaztsınk» kásipornyndaǵy apattan zardap shekkenderge kómek kórsetý úshin kelgen respýblıkalyq bas kompýstıolog óndiriste denesi kúıip qalǵan taǵy bir naýqasty qosymsha tekserip shyqty.
Ol Úlbi metallýrgııalyq zaýytynyń qyzmetkeri. Belgili bolǵandaı, jumysshy 18 sáýir kúni berıllıı óndirý tsehyndaǵy jazataıym oqıǵa saldarynan jaraqat alǵan.
Shyǵys Qazaqstan oblystyq Densaýlyq saqtaý basqarmasynyń málimetinshe, 1984 jyly týǵan azamat óndiristik jaraqattan keıin denesiniń shamamen jartysyn kúıik shalýyna baılanysty aýrýhanaǵa jatqyzylǵan.
— Kúıik shalǵan aýmaq 45–49 paıyzdy quraıdy, zaqymdaný dárejesi — 3AB. Naýqasqa mamandandyrylǵan emniń kelesi kezeńi kórsetilýi qajet, teri aýystyrý operatsııasy josparlanyp otyr, — dep habarlady vedomstvo ókilderi.
Tekserý qorytyndysy boıynsha respýblıkalyq maman naýqasty Astanadaǵy Ulttyq shuǵyl medıtsına úılestirý ortalyǵyna jetkizýdi usynǵan.
— Barlyq medıtsınalyq qujat sanıtarlyq avıatsııa qyzmetine joldandy, tasymaldaýǵa kelisim alyndy. Qazirgi ýaqytta naýqasty jetkizý merzimi naqtylanyp jatyr, — delingen habarlamada.
Jumysshy tehnologııalyq protsess kezinde aýyr kúıik alǵan.
Eske salsaq, osyǵan deıin «Qaztsınk» kásipornyndaǵy jarylystan zardap shekkenderdiń biri sanavıatsııamen Astanaǵa jetkiziletindigi habarlanǵan.
