Óskemende daýyldan keıin úıler men áleýmettik nysandarǵa qaıta jaryq qosyldy
ÓSKEMEN. KAZINFORM — Óskemende daýyldan keıin qalanyń barlyq turǵyn aýdanynda elektrmen jabdyqtaý qalpyna keltirildi.
Degenmen brıgadalar saıajaı alqaptaryndaǵy apat saldaryn joıý, baǵdarshamdar men syrtqy jaryqtandyrý jelilerin qalpyna keltirý jumystaryn jalǵastyryp jatyr.
Qala ákimdiginiń málimetinshe, turǵyn úıler men áleýmettik nysandardaǵy negizgi apattyq-qalpyna keltirý jumystary aıaqtalǵan.
— Buǵan deıin elektr qýaty óshirilgen barlyq shaǵyn aýdanda elektrmen jabdyqtaý tolyq kólemde qalpyna keltirildi. Qazirgi ýaqytta Ponton kópiriniń mańy, Samsonovka jáne Leshoz kentterindegi elektr berý jelileri men 0,4 kV jelilerinde, jer úı turǵyndarynyń jekelegen ótinishteri boıynsha jumys jalǵasyp jatyr, — dep habarlady ákimdiktiń baspasóz qyzmetinen.
Sonymen qatar kommýnaldyq qyzmetter qala ınfraqurylymyn qalpyna keltirý jumystaryn jalǵastyryp jatyr. Qolaısyz aýa raıy saldarynan isten shyqqan 36 baǵdarshamnyń 29-y qaıta iske qosyldy. Sondaı-aq «Gorsvet LTD» JShS mamandary syrtqy jaryqtandyrý jelilerin jóndeý jumystaryn júrgizip jatyr.
— Daýyldan keıin jalpy uzyndyǵy shamamen 1,2 shaqyrym bolatyn oqshaýlanǵan symnyń 29 aralyǵy qalpyna keltirildi. Qazirgi ýaqytta taǵy alty ýchaskede jumys jalǵasyp jatyr, — delingen aqparatta.
Nóser jaýynnyń saldaryn joıý jumystary da aıaqtalýǵa jaqyn. Jańbyr sýyn sorý boıynsha kelip túsken 15 ótinishtiń 11-i oryndaldy. Qalǵan tórt ýchaskede jumystar áli de jalǵasyp jatyr.
Eske salsaq, osyǵan deıin Óskemende daýyldyń saldarynan 25 myńǵa jýyq adam jaryqsyz otyrǵany habarlanǵan.
