Óskemende daýyldan keıin ondaǵan kólik búlindi
ÓSKEMEN. KAZINFORM — Óskemende daýyl saldarynan ústine aǵash qulap, zaqymdanǵan avtokólikterdiń ıelerinen ishki ister organdaryna ótinishter áli túsip jatyr.
Qala ákimdiginiń málimetinshe, daýyl kezinde ortalyq kóshelerde jel 15 aǵashty qulatqan. Olardyń birqatary jol jıeginde turǵan avtokólikterdiń ústine qulady.
— Qazirgi ýaqytta polıtsııaǵa aǵashtardyń qulaýy saldarynan kólikteri zaqymdanǵan 17 avtokólik ıesinen aryz tústi, — dep habarlady ShQO polıtsııa departamentiniń baspasóz qyzmetinen.
Polıtsııaǵa áli barlyq zardap shekken kólik ıeleri júginip úlgermegen bolýy da múmkin.
Eske salaıyq, keshe kúndiz Óskemende nóser jańbyr men burshaq jaýyp, ekpindi jel soqqan bolatyn.
Sonyń saldarynan shamamen 25 myń adam jaryqsyz qaldy.
Turǵyn úılerdiń shatyrlary zaqymdanyp, aǵashtar qulap, baǵdarshamdar isten shyǵyp, joldardyń jekelegen ýchaskelerin sý basty.
Qazirgi ýaqytta qolaısyz aýa raıynyń saldary joıyldy. Kommýnaldyq qyzmetter negizgi kóshelerdi tazartý jumystaryn aıaqtap, shaǵyn aýdandardy elektr energııasymen tolyq qamtamasyz etti.
