Óskemende daýyl men nóser jańbyrdan jaryq óship, kóshelerdi sý basty
ÓSKEMEN. KAZINFORM - Óskemen qalasynda qatty jelden birneshe shaǵyn aýdan halqy jaryqsyz qaldy.
Qalada qolaısyz aýa raıynan, atap aıtqanda qatty jel, nóser jańbyr jáne burshaq jaýýyna baılanysty birqatar aýdanda elektr energııasy úzildi. Sonymen qatar aǵashtar qulap, keıbir kóshelerdi sý basty.
- Qazirgi ýaqytta elektr energııasynyń ýaqytsha óshýi Ahmer kentinde, 19-shy shaǵyn aýdanda, áýejaı, Shmelev Log jáne «Bolashaq» shaǵyn aýdandarynda tirkeldi. Qalanyń kommýnaldyq jáne apattyq qyzmetteri kúsheıtilgen rejımde jumys istep jatyr. Qulaǵan aǵashtardy alý, kóshelerden sýdy sorý jáne elektrmen jabdyqtaýdy qalpyna keltirý boıynsha barlyq qajetti jumystar júrgizilip jatyr, - dep habarlady Óskemen qalasy ákimdiginiń baspasóz qyzmetinen.
Qala ákimdigi turǵyndardy qaýipsizdik sharalaryn saqtaýǵa, aýa raıy turaqtalǵanǵa deıin asa qajettilik bolmasa syrtqa shyqpaýǵa jáne aǵashtar men elektr jelileriniń mańynda júrmeýge shaqyrdy.
Eske salsaq, osyǵan deıin Óskemende qatty jelden 5 úıdiń shatyry búlingeni habarlanǵan.
