Óskemende dárigerler órtten zardap shekken 5 jasar balany aman alyp qaldy
ShQO Densaýlyq saqtaý basqarmasynyń málimetine súıensek, aýyr háldegi 5 jasar bala sanıtarlyq avıatsııamen Óskemendegi Ana men bala ortalyǵyna jetkizilgen. Shuǵyl túrde ol jansaqtaý bólimine jatqyzyldy.
Es-tússiz bala durys dem ala almaı jatty, ári qatty jóteldi. Sol jaq qasynyń ústinde, sol jaq qulaǵy men oń ıyǵynda kúıik izderi baıqaldy.
Belgili bolǵandaı, túngi ýaqytta úıden órt shyǵyp, sonyń saldarynan búldirshin zardap shekken. Dárigerler oǵan «Kómirqyshqyl gazymen aýyr dárejedegi ýlaný, oń jaqty pnevmonııa» dıagnozyn qoıdy.
«Bala birinshi kúndi tolyqqandy apparattyq emdeýden ótti. Ana men bala ortalyǵynyń dárigerleri, anestezıolog-reanımatologtary ony aman alyp qalý úshin baryn saldy. Jaǵdaıy ońala bastaǵannan keıin patsıent jasandy tynys alý apparatynan shyǵarylyp, ózdiginen dem ala bastady. Qazir balanyń jaǵdaıy jaqsy», - delingen aqparatta.
Búldirshinniń anasy ulynyń ómiri úshin kúresken dárigerlerge alǵysyn aıtyp, shynaıy rızashylyǵyn bildirdi.