Óskemende Dańq memorıalyn búldirgen vandaldar izdestirilip jatyr
ÓSKEMEN. QazAqparat – Óskemen qalasynda polıtsııa qyzmetkerleri Ekinshi dúnıejúzilik soǵys ardagerleriniń qurmetine ornatylǵan Dańq memorıalyn buzǵan vandaldardy izdestirýde, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, 24 mamyr kúni polıtsııaǵa belgisiz bireýlerdiń Dańq memorıalyn buzǵany týraly aqparat túsken.
Anyqtalǵandaı, vandaldar Máńgilik alaýdaǵy jasandy gúlderdi órtep jibergen.
Bunymen qoımaı, janǵan gúlderdi soǵys ardagerleriniń aty-jóni jazylǵan eskertkishke tósegen.
«Qazirgi ýaqytta atalǵan fakti boıynsha QR Qylmystyq Kodeksiniń 294-babyna sáıkes sotqa deıingi tergeý amaldary bastaldy», - dep habarlady vedomstvo ókilderi.
Tártip saqshylary vandaldardyń kim ekenin anyqtaý úshin jedel-izdestirý sharalaryn júrgizip jatyr.
