Óskemende bıýdjetten 67 mln teńge jymqyrǵan dırektor sottaldy

ÓSKEMEN. QazAqparat - «Aýyl sharaýshylyǵyn qarjylaı qoldaý qory» AQ oblystyq fılıalynyń burynǵy dırektory 8 jylǵa sottaldy, dep habarlaıdy QazAqparat Altaynews.kz-ke silteme jasap. 

Ol 2008 - 2015 jyldar aralyǵynda atalmysh fılıalda zańger, odan soń dırektordyń orynbasary, dırektor bolyp isteı júrip, uıymdasqan qylmystyq top qurǵan. Sóıtip, aýyl turǵyndaryna nesıe berý úshin bólingen bıýdjet qarjysyn jymqyryp kelgen.

5 adamnan turatyn qylmystyq top jalǵan kepildik múlik kelisimsharty negizinde jalǵan nesıe qujattaryn jasaǵan. Sol arqyly Úrjar, Kókpekti, Borodýlıha aýdandarynyń jáne Óskemen, Semeı qalalarynyń turǵyndaryna nesıe berý týraly sheshim shyǵaryp otyrǵan.

Qylmystyq top qarjyny nesıe alýshy turǵyndardyń atyna aýdaryp otyrǵan. Nesıe alýshy turǵyndar «syıaqy» retinde ol qarjynyń shaǵyn bóligin alyp qalyp, qalǵanyn qylmystyq top músheleri arqyly qor fılıalynyń dırektoryna beretin.

Eks-dırektordyń qylmystyq áreketterinen «Aýyl sharýashylyǵyn qarjylaı qoldaý qory» AQ Shyǵys Qazaqstan oblystyq fılıalyna 67 mıllıon 510 myń 867 teńge, turǵyndarǵa 24 mıllıon 300 000 teńge materıaldyq shyǵyn kelgen.

Ol laýazymdyq ókildigin asyra paıdalanyp, uıymdasqan qylmystyq top qurǵany jáne alaıaqtyq áreketter jasap, memleketke asa iri mólsherde shyǵyn keltirgeni úshin 8 jylǵa bas bostandyǵynan aıryldy.

Sot úkimi kúshine áli engen joq.