Óskemende buzaqylar memlekettik rámizderdi qıratyp ketti
ÓSKEMEN. QazAqparat - Óskemenniń «Qazaqstan» shoqysyndaǵy memlekettik rámizderdi buzaqylar qıratyp ketken. «Óskemen tártip» mekemesiniń basshysy Tamara Rahymjanova Ánuran mátini jazylǵan taqtany osymen ekinshi ret jańalaıtyndaryn aıtady, dep habarlaıdy QazAqparat tilshisi.
Dabyldy áleýmettik jeli qoldanýshylary qaqqan bolatyn. Aıqush-uıqysh shımaı, synǵan oryndyq, talqandalǵan taqtatas, shashylǵan qoqys, beıádep sýretter sımvolyq shoqynyń ajaryn ketirip tur. Bastapqyda bul shoqynyń etegine ishki ister qyzmetiniń beketi ornatylǵan bolatyn. Eldiń kózi úırengen soń ol beket jumysyn toqtatqan. Saqshylardyń ketýi muń eken, vandaldar belsendilin tanyta bastaǵan.
«Qazir nysannyń basynda tórt adam júr. Materıaldar tolyq ákelingen soń segiz adam jumys isteıtin bolady. Bizdiń mindet Ánuran taqtastyn jańalap, monýmenttiń jel mújigen tustaryn jóndeý. Soqpaqqa tóselgen taqtalar qoparyla bastapty. Ony da jóndeımiz. 20 mamyrǵa deıin ýaqyt berildi. Biraq aýa raıy jumysqa qolbaılaý bolyp tur. Al monýmentke beınebaqylaý ornatý smetada kórsetilmegen. Qalaı bolǵanda da bul nysanǵa turaqty kúzet qajet» - deıdi «A Stroı» JShS dırektory Aıjigit Aıjanov.
Jóndeý jumystaryna qarajat «Óskemen tártip» mekemesi arqyly bólinip otyr. Mekeme dırektory Tamara Rahymjanova Ánuran mátini jazylǵan taqtany ekinshi jyl aýystyryp otyrǵandaryn aıtady.
«Jel jaǵadan alǵanda, vandaldar balaqqa jarmasyp qoımaı tur. Byltyr ǵana Ánuran taqtasyn jańalaǵan bolatynbyz. Bıyl taǵy qıratyp ketken. Ázirge 2,8 mln teńgeniń kelisimshartyn bekittik. Qalǵan jumystarǵa qarjy bólý máselesin qalalyq máslıhat sheshedi. 4 shildedegi Memlekettik rámizder kúnine deıin barlyq olqylyq joıylady, - deıdi ol.
