Óskemende bir aıdyń 15 kúninde aýa sapasy lastanyp turǵan

ÓSKEMEN.KAZINFORM — Óskemen qalasynda qańtar aıynda 15 kún qolaısyz meteorologııalyq jaǵdaı jarııalanǵan.

Shyǵys Qazaqstan oblysynyń ortalyǵynda eki kúnniń birinde atmosferalyq aýa lastanyp turdy. Bul týraly «Qazgıdromet» RMK oblystyq fılıalynan málim etti.

Osy ýaqyt ishinde kúkirtsýtek kórsetkishi ruqsat etilgen shekten 543 ret asqany anyqtaldy. Al kúkirt dıoksıdi ruqsat etilgen shekten 456 ret, kómirtegi dıoksıdi 141 ret, sýtegi hlorıdi 83 ret jáne fenol toǵyz ret asqany tirkeldi.

— Qolaısyz aýa raıy jaǵdaılary 15 kúnge, naqty aıtqanda 2-4 qańtar, 15-20 qańtar jáne 22, 23 jáne 28-31 qańtar aralyǵynda qalyptasty. Bul kezderde lastaýshy zattar atmosferanyń tómengi qabatynda shoǵyrlanyp turdy. Qaýipti zattardyń osyndaı deńgeıge deıin joǵarylaýy aýa sapasyn ólsheý ár 20 mınýt saıyn júrgiziletindigine baılanysty. Bul árbir element bir kúnde 72 ret ólshenedi degen sóz, — delingen aqparatta.

Sınoptıkterdiń málimetinshe, ónerkásiptik kásiporyndar, avtokólikter jáne jeke sektor aýa lastanýynyń negizgi sebepteri.

Eske salsaq, osyǵan deıin Óskemende aýaǵa taraǵan 3 zııandy zattyń mólsheri shekti deńgeıden asyp ketkeni habarlanǵan.