Óskemende bir aptada 9 adamdy ıt qapty

ÓSKEMEN. KAZINFORM — Óskemen qalasynda ıttiń adamǵa shabýy jıilep ketti. Qala turǵyndary kóshede ıtterdiń qaptap júrgenin, tipti adamǵa atylatyndyǵyn aıtyp shaǵymdandy. Arasynda qańǵyrǵan ıtterden zardap shekkender de az emes.

— Áýezov dańǵylynda áıel adamǵa buralqy ıtterdiń tap bergenin óz kózimmen kórdim. Sol mańdaǵy azamattar kómektesip qaldyq. Áıeldiń ornyna bala bolsa ıtter baıaǵyda talap tastar edi, — deıdi Ashat esimdi óskemendik. 

ShQO Polıtsııa departamentiniń habarlaýynsha, ıt qapqandar tártip saqshylaryna aryz túsirýde.

— 31 naýryz ben 6 sáýir aralyǵynda polıtsııaǵa qala turǵyndarynan ıtterdiń adamǵa shabýy týraly 9 aryz tústi. Qazir tıisti sharalar atqarylyp jatyr, — delingen aqparatta.

Eske salsaq, buǵan deıin depýtat buralqy ıtterdi evtanazııa ádisimen uıyqtatý normasyn usynǵany jaıly jazǵanbyz.