Óskemende boı kóteretin tennıs ortalyǵy halyqaralyq standarttarǵa saı bolady
ÓSKEMEN. QazAqparat – Qazaqstanda halyqaralyq standarttarǵa saı keletin tennıs ortalyǵy Óskemen qalasynda salynyp jatyr, dep habarlaıdy QazAqparat tilshisi.
El Táýelsizdiginiń 30 jyldyǵyna oraı boı kóteretin tennıs ortalyǵynyń jalpy aýdany 9,6 myń sharshy metrdi quramaq. Sýyq túskenge deıin ortalyq ǵımaraty tolyǵymen salynady. Árleý jumystary jyly bólmede júrgizilýi úshin barlyq kommýnıkatsııalar, atap aıtqanda jylý, jaryq, sý júrgizilgen.
«Ortalyqta 2 sport zaly bolady. Biri halyqaralyq standarttarǵa sáıkes kelse, ekinshisi – jattyǵý zaly. Osylaısha, munda bir ýaqytta 250-ge jýyq sportshy aınalysa alady. Jarys zalynda 18 tennıs ústeli ornatylady. Sondaı-aq múmkindigi shekteýli sportshylarǵa arnalǵan ústelder de qarastyrylǵan», - dedi oblys ákimi Danıal Ahmetov.
Búginde tennıs – olımpıadalyq sport túrleriniń qatarynda. Tek ShQO-da 11 myńǵa jýyq sportshy 458 tennıs sektsııasyna qatysady. Jańa ortalyq oblys tennısshilerine óz sheberlikterin shyńdaýǵa múmkindik beredi. Munda medıtsınalyq-qalpyna keltirý ortalyǵy da jumys isteıdi. Osylaısha, sportshylar zamanaýı medıtsınalyq kómek ala alady.
