Óskemende bótenniń kóligin aıdap ketken 3 jasóspirim ustaldy
Qalalyq Polıtsııa basqarmasy baspasóz qyzmetiniń málimetine súıensek, 48 jastaǵy er adam polıtsııaǵa qońyraý shaldy. Óz sózinde ol tańǵy saǵat 06.00 shamasynda belgisiz bireýlerdiń «VAZ-2105» markaly kóligin aıdap ketkenin jetkizdi. Osynyń saldarynan jábirlenýshige 800 myń teńge mólsherinde materıaldyq shyǵyn keltirilgen.
Polıtsııa qyzmetkerleri birden izdestirý sharalaryna kiristi. Kóp uzamaı jedel basqarý ortalyǵy kameralarynyń kómegimen kóliktiń qaı baǵytta júrgeni anyqtaldy. Tártip saqshylary sol jerge jetkende 3 jasóspirim kólikti tasjolǵa tastap, ormanǵa qaraı qashyp bara jatqan. Olardyń sońyna túsken polıtseıler 14-17 jas aralyǵyndaǵy shahar turǵyndaryn ustady.
«Olar avtokólikti qydyrý úshin aıdap ketkenderin aıtty. Belgili bolǵandaı, kólikte dabyl júıesi bolmaǵan. Kámeletke tolmaǵan júrgizýshige qatysty QR QK-niń 200-baby 2-bóligi boıynsha qylmystyq is qozǵaldy. Sondaı-aq balalardyń ata-analaryna QR ÁQBtK-niń 434-baby 1-bóligine sáıkes ákimshilik hattama toltyryldy», - dedi basqarmasy bastyǵy Andreı Mýla.