Óskemende bostandyǵy shektelgen er adam probatsııalyq baqylaý sharttaryn buzǵany úshin qamaldy
ÓSKEMEN. KAZINFORM – Óskemende sot sheshimimen bas bostandyǵynan shektelgen azamat esirtkige táýeldilikten arylyp, ómirin túzeýdiń ornyna elektrondy bilezigin sheshpeı, kóshe kezip «zakladka» izdegen.
ShQO boıynsha QAJ departamenti baspasóz qyzmetiniń málimetinshe, probatsııa qyzmetiniń esebine qoıylǵan er adamǵa aǵa ınspektor Adelıa Rınatova jaýapty bolǵan. Ol azamatqa jan-jaqty qoldaý kórsetip, qaladaǵy naýbaıhanalardyń birine jumysqa ornalasýǵa kómektesken.
– Áýeli júk tıeýshi bolyp jumys istep, qalaǵa nan tasymaldap júrgen azamattyń burynǵy áıelimen qarym-qatynasy da jaqsara bastady. Alaıda birazdan keıin bári teris ketti. Jumys pen otbasynyń ornyna ol «zakladka» izdeı bastady. Probatsııalyq baqylaý sharttaryn buzyp, túrli jerlerge tyǵylǵan esirtkilerdi izdeýge kóshken, - delingen aqparatta.
Tártip buzýshylyqtar elektrondy baqylaý júıesiniń kúndelikti monıtorınginiń arqasynda anyqtaldy. Onyń aıaǵyna taǵylǵan bilezik ruqsat etilgen aımaqtan shyǵyp ketkenin birneshe ret tirkegen. Sonymen qatar azamat probatsııa qyzmetine mindetti tirkelýge kelýdi toqtatqan.
– Ol bilezikti óz betinshe sheshýge árekettengen. Bileziktiń beldikterin ádeıi kúıdirip, erip ketedi dep úmittengen. Biraq bul sátte de GPS-sensor jumys istep turyp, onyń qala boıynsha barlyq qozǵalysyn dál tirkep otyrǵan. Kóptegen buzýshylyǵy úshin óskemendiktiń jazasy bas bostandyǵynan aıyrýmen aýystyryldy. Er adam 1 jyl 7 aı merzimge qaýipsizdigi barynsha joǵary kolonııaǵa qamaýǵa alyndy, - delingen habarlamada.
Eske salsaq, osyǵan deıin Óskemende kúıeýin pyshaqtap óltirgen áıel 8 jylǵa sottalǵany habarlanǵan.