Óskemende «bomba qoıylǵan» mektepterde tekserý jumysy aıaqtaldy

ÓSKEMEN. QazAqparat – Óskemen qalasynda mektepterden jarylǵysh zat tabylmady, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, 14 aqpan túski ýaqytta Óskemendegi 23 mekteptiń elektrondy poshtasyna jarylǵysh zat qoıylǵany týraly túrli IP mekenjaılardan habarlama kelip túsken.

Mamandandyrylǵan qyzmetter dereý mektepterge keldi.

«Qyzmetkerler men oqýshylardy evakýatsııalaý júrgizildi. Mektepterdi tekserý nátıjeleri boıynsha qandaı da bir qaýipti zattar tabylǵan joq. Atalǵan fakti boıynsha QR QK-niń 273-babymen sotqa deıingi tergeý bastaldy. Qazirgi ýaqytta jarylǵysh zat týraly jalǵan habarlaǵan adamdardy anyqtaý boıynsha is-sharalar júrgizilýde. Mundaı qylmys jasaǵany úshin 5 jylǵa deıin bas bostandyǵynan aıyrý jazasy qarastyrylǵanyn eskertemiz», - delingen aqparatta.

Eske salsaq, buǵan deıin Óskemen qalasynda sońǵy 9 kúnde mektepke bomba qoıylǵany týraly besinshi habar túskeni habarlanǵan.