Óskemende bomba bar dep habarlanǵan 6 mektepten jarylǵysh zat tabylmady
ShQO polıtsııa departamenti baspasóz qyzmetiniń málimetine súıensek, 8 qarasha kúni saǵat 10-41-de Óskemen qalasyndaǵy 6 mektepke bomba qoıylǵany týraly habar túsken.
Birden mamandandyrylǵan qyzmet mamandary oqıǵa ornyna kelip jetti.
«Mektepterde qyzmetkerler men oqýshylar evakýatsııalandy. Tekserý nátıjesinde qandaı da bir qaýipti zattar tabylǵan joq. Atalǵan fakti boıynsha Qylmystyq kodekstiń 273-babymen sotqa deıingi tergeý bastaldy. Qazirgi ýaqytta jarylǵysh zat týraly kórineý jalǵan habar taratqan adamdardy anyqtaý boıynsha is-sharalar júrgizilip jatyr», - delingen aqparatta.
Polıtsııa departamenti mundaı qylmys jasaǵan adamnyń qoǵamdyq rezonans týdyratynyn jáne onyń yqtımal saldaryn eskere otyryp, 5 jylǵa deıingi merzimge bas bostandyǵynan aıyrylatynyn eskertedi.
Eske salsaq, osyǵan deıin Óskemende polıtsııaǵa birneshe mektepke bomba qoıylǵany týraly habar túskenin habarlaǵan edik.
