Óskemende bıznes ashpaq bolǵan jigit alaıaqqa 23 mln teńge bergen

ÓSKEMEN. KAZINFORM – Óskemen qalasynyń turǵynyn aldap soǵyp, 23 mln teńge paıda kórgen 31 jastaǵy er adam ustaldy.

Tanysyn áńgime tartqan alaıaq «chıpsy satatyn bıznes ashaıyq» dep usynys jasap, mol tabysqa jetetindigin aıtyp kóndirgen. Buǵan sengen azamat oǵan 23 mln teńge bergen.

Alaıda aqsha qolǵa tıisimen 31 jastaǵy er adam múlde baılanysqa shyqpaı, joǵalyp ketken. Aldanyp qalǵanyn túsingen jábirlenýshi polıtsııaǵa habarlasty.

- Kóp uzamaı kúdikti ustalyp, jaýap alý kezinde óz kinásin tolyqtaı moıyndady. Qazirgi ýaqytta QR QK-niń 190-baby (Alaıaqtyq) boıynsha sotqa deıingi tergeý amaldary júrgizilip jatyr, - dep habarlady ShQO Polıtsııa departamentiniń baspasóz qyzmetinen.

Osy rette, tártip saqshylary azamattardy barynsha saq bolýǵa jáne bir jerge qarajat salmas buryn anyq-qanyǵyn muqııat tekserip alýǵa shaqyrdy. Ásirese, kúdik uıalatatyn tym tıimdi sharttar usynǵan adammen kelisim jasaýda abaı bolý qajet.

Eske salsaq, osyǵan deıin ShQO-da alaıaqtar sheneýnikterdiń atynan áleýmettik jelide paraqshalar ashyp jatqany habarlanǵan.