Óskemende bıyl muqtaj jandarǵa 85 turǵyn úı sertıfıkaty beriledi

ÓSKEMEN. QazAqparat – Óskemende osy jyly muqtaj jandarǵa 85 turǵyn úı sertıfıkaty beriledi, dep habarlaıdy QazAqparat tilshisi.

Búgin Óskemen qalasynyń jurtshylyǵymen kezdesken aımaq basshysy Danıal Ahmetov áleýmettik osal toptaǵy azamattarǵa qandaı kómek kórsetiletinin aıtty.

«2022 jyly óńir boıynsha 3255 az qamtylǵan azamat ataýly áleýmettik kómek alady. Sondaı-aq turmysy tómen otbasylardan shyqqan 1100 bala kepildi áleýmettik paketpen qamtamasyz etiledi. Ipotekalyq nesıeleý arqyly úı alý múmkindigin keńeıtý úshin qalalyq bıýdjetten 85 turǵyn úı sertıfıkatyn berýge 127,5 mln teńge bólindi», - dedi ol.

Erekshe qajettilikteri bar balalardy qoldaý maqsatynda «Úlbi» halyqqa áleýmettik qyzmet kórsetý ortalyǵynda jóndeý jumystary júrgizilmek.

«Bul maqsatqa 196,7 mln teńge baǵyttaldy. «Úlbi» ortalyǵy qajetti jabdyqtarmen qamtamasyz etilip, materıaldyq-tehnıkalyq bazasy nyǵaıtylady. Ortalyq mamandary erekshe qajettilikteri bar balalarǵa sapaly jáne keshendi kómek kórsetý úshin arnaıy oqýdan ótedi», - dedi Danıal Ahmetov.