Óskemende bıyl ashylatyn emhanada jasandy ıntellekt jumys isteıdi
ÓSKEMEN. QazAqparat – Óskemen qalasynda jeltoqsan aıynda jańa emhana ashylmaq, dep habarlaıdy QazAqparat tilshisi.
ShQO ákimi Danıal Ahmetovtyń aıtýynsha, 1 jeltoqsanda Óskemendegi burynǵy sút taǵamdary ashanasynyń ornyna jańa emhana patsıentter úshin óz esigin ashady.
«25 qarashaǵa qaraı qurylys kompanııasy jóndeý jumystaryn aıaqtap, medıtsınalyq mekemege túrli aýrýlardy jedel dıagnostıkalaýǵa jáne emdeýge múmkindik beretin zamanaýı jabdyqtar ornatady. Sonymen qatar emhana PACS júıesine qosylady. Bul – jasandy ıntellekt kómegimen faıldardy muraǵattaý jáne taratýdyń medıtsınalyq júıesi. Osylaısha, kúrdeli jaǵdaılardy taldaýǵa múmkindik jasalady», - deıdi aımaq basshysy.
Onyń aıtýynsha, búgingi tańda medıtsınalyq qyzmet kórsetý jeke klınıkalarda asa qymbatqa túsedi.
Sondyqtan jaqyn arada Óskemen qalasynda bes birdeı emhana ashylmaq. Onyń ekeýi úshin ǵımarattar tańdaldy.
Emhanalar qajetti medıtsınalyq jabdyqtarmen tolyqtaı jabdyqtalady.
