Óskemende bıyl 40-qa jýyq bala jol apatynan jaraqat aldy
ÓSKEMEN. QazAqparat – Óskemen qalasynda jyl basynan beri 40-qa jýyq bala jol apatynan zardap shekken, dep habarlaıdy QazAqparat tilshisi.
Qalalyq Polıtsııa basqarmasy baspasóz qyzmetiniń málimetine súıensek, osy jyldyń 9 aıynda shahar boıynsha 168 jol-kólik oqıǵasy tirkelgen. Sonyń saldarynan 214 adam túrli dárejedegi dene jaraqattaryn alyp, 4 adam kóz jumdy.
«Joldaǵy oqys oqıǵalar ótken jylmen salystyrǵanda 6 paıyzǵa azaıyp otyr. Alaıda balalardyń qatysýymen bolǵan jol apaty birshama ósti. Naqty aıtqanda, bıyl 31 jaǵdaı bolsa, byltyrǵy kórsetkish – 16-ny quraǵan», - dep habarlady vedomstvo ókilderi.
Jyl basynan beri 37 bala jol-kólik oqıǵalarynan zardap shekti. Oqýshylar jaıaý júrginshiler jolaǵynan ótip bara jatqan kezde jáne kólikterdiń soqtyǵysýynan jaralanǵan.
