Óskemende bıyl 16 jasóspirim óz ózine qol jumsamaq bolǵan
ÓSKEMEN. QazAqparat – Óskemen qalasynda jyl basynan beri 16 jasóspirim óz ózine qol jumsamaq boldy, dep habarlaıdy QazAqparat tilshisi.
Qalalyq Polıtsııa basqarmasy baspasóz qyzmetiniń málimetine súıensek, bıyl kámelet tolmaǵandar arasynda sýıtsıd jasamaq bolǵandar sany birshama artty. Ótken jyly osyndaı 5 fakti tirkelse, osy jyly mundaı qadamǵa 16 bala barmaq boldy.
«Alty jasóspirim qolyn tilse, taǵy altaýy dári ishken. Úsh bala asylyp qalmaq bolsa, bireýi bıikten sekirdi. Abyroı bolǵanda, olardyń bári aman qaldy. Atalǵan faktilerdiń árqaısysy boıynsha QR Qylmystyq kodeksiniń 105-babyna (óz ózine qol jumsaýǵa ıtermeleý) sáıkes sotqa deıingi tergeý amaldary qolǵa alynǵan», - deıdi PB bastyǵynyń birinshi orynbasary Oral Ryspaev.
Statıstıka kórsetkendeı, kóp jaǵdaıda 13-16 jas aralyǵyndaǵy qyzdar sýıtsıd jasamaq bolady.
