Óskemende bir top jastar qolyna taıaq alyp tóbelesti
ÓSKEMEN. QazAqparat – Óskemen qalasynda bir top jastar qolyna taıaq alyp tóbelesti, dep habarlaıdy QazAqparat tilshisi.
Keshe túngi ýaqytta qoldaryna taıaq alyp jappaı tóbelesken jastardyń vıdeosy áleýmettik jelilerde tarap ketti. Oqıǵa ornyna tártip saqshylary shuǵyl attanǵan.
«Saǵat 22.40 shamasynda «102» jedel arnasyna Amýrskaıa kóshesinde bir top adamnyń tóbelesip jatqany týraly habar tústi. Polıtseıler jigitterdiń birnesheýin ustap, bólimshege jetkizdi. Jazbasha jaýap alynǵan soń profılaktıkalyq jumystar júrgizildi. Tóbeleske qatysqan er adamdardyń barlyǵy dene jaraqatyn alǵandaryn joqqa shyǵaryp, aryz jazýdan bas tartty», - dep habarlady ShQO Polıtsııa departamentiniń baspasóz qyzmeti.
Soǵan qaramastan, polıtsııa qyzmetkerleri atalǵan fakti boıynsha QR Qylmystyq kodeksiniń 293-babyna (buzaqylyq) sáıkes sotqa deıingi tergeý amaldaryn bastady.
