Óskemende bir saǵattyń ishinde tótenshe jaǵdaı rejımin buzǵan 10 júrgizýshi anyqtaldy
ÓSKEMEN. QazAqparat – Óskemen qalasynyń polıtseıleri qosymsha shekteý talaptaryn buzǵan kásipkerlerdi anyqtady, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, kásip ıelerine berilgen ruqsat qaǵazdary olardyń kún saıyn qala ishinde júrýine múmkindik beredi. Tek aldyn ala bekitilgen marshrýttan aýytqymaý kerek.
Osy rette «Sergek» kameralary arnaıy ruqsat alǵan kólik quraldarynyń qozǵalysyn baqylaýǵa múmkindik beredi.
«Anyqtalǵandaı, jasyl tústi ruqsat qaǵazy bar júrgizýshilerdiń arasynda zań talabyn oryndamaıtyndary da bar. Bir saǵattyń ishinde osyndaı 10 kólik toqtatyldy. Polıtsııa qyzmetkerleri olarǵa túsindirý jumystaryn júrgizip, shekteý sharalaryn qatań saqtaý kerektigin eskertti. Eger júrgizýshiler taǵy da osyndaı zańbuzýshylyqqa jol berip jatsa, 15 táýlikke qamaýǵa alynýy múmkin», - dep habarlady vedomstvo ókilderi.
