Óskemende bir apta buryn joǵalǵan áıel «Sergek» kamerasy arqyly tabyldy
ÓSKEMEN. QazAqparat – Óskemen qalasynda osydan 1 apta buryn joǵalyp ketken áıel adam aman-esen tabyldy, dep habarlaıdy QazAqparat tilshisi.
Qalalyq Polıtsııa basqarmasy baspasóz qyzmetiniń málimetine súıensek, shahar turǵyny Aıaýlym Sadyqova 25 qazan kúni úıinen shyǵyp ketip, sol kúıi qaıtyp oralmaǵan. Anyqtalǵandaı, kúıeýimen janjaldasyp qalǵan ol túngi ýaqytta qurbysynyń úıine baryp qondy. Al 26 qazanda sol úıden belgisiz baǵytta ketip qalǵan áıeldiń qaıda ekenin eshkim bilmegen.
«Zaıybyn óz betimen qansha izdegenimen esh nátıje shyqpaǵannan keıin er adam polıtsııaǵa habarlasyp, kómek surady. Tártip saqshylary men eriktiler jedel-izdestirý sharalaryna kirisken. Alaıda birneshe kún boıy áıel adamdy tabý múmkin bolmady», - delingen aqparatta.
Arada bir apta ótken soń Aıaýlym Sadyqova aman-esen tabyldy. Prostornaıa kóshesinde júrgen ony polıtsııa qyzmetkerleri «Sergek» kamerasy arqyly taýyp alǵan. Belgili bolǵandaı, áıel osy ýaqyt boıy sol kóshede turatyn qurbysynyń úıinde jatty.
