Óskemende bilim salasynyń 13 qyzmetkeri jaýapkershilikke tartyldy
ÓSKEMEN. QazAqparat - Óskemendegi keıbir jalpy bilim beretin mekemeler oqýshy qujattaryn qabyldaýdyń óz tártibin ornatyp alǵan, dep habarlaıdy QazAqparat Altaınıýske silteme jasap.
Keı dırektorlardyń «qalalyq bilim bólimine kettim» degen syltaýmen jumys ornynda bolmaıtyny, olarsyz memlekettik qyzmet kórsetilmeıtini áshkerelendi. Sonymen qatar, olar qyzmet alýshylardan faıl men qujattardy tigetin papka talap etken.
Bul olqylyqtar oblystyq memlekettik qyzmet isteri jáne sybaılas jemqorlyqqa qarsy is-qımyl departamentiniń mamandary júrgizgen «Jasyryn satyp alýshy»qoǵamdyq baqylaý sharasy kezinde anyqtaldy.
Memlekettik qyzmetshilerdiń ádep jónindegi keńesiniń sheshimimen bilim salasynyń on úsh qyzmetkeri tártiptik jaýapqa tartyldy.
Mysaly, oqýshyny №47 mektepke qabyldaý úshin ata-anaǵa eki ret ótinish jazýǵa týra keledi. Aldymen mektep dırektoryna balanyń qujattaryn qabyldaý qyzmetin kórsetý jónindegi ótinimdi qaraý týraly ótinish jazylady. Al №9 mektepte ata-anasynyń jumys ornynan anyqtama talap etken.
Oqý mekemeleri «Memlekettik qyzmetter týraly» Zańda kórsetilgen jumys kestesin de saqtamaıtyny belgili boldy. № 7, № 11, № 26, № 35, № 43 mektepterde qujattardy 17.00-ge deıin qabyldasa, birqatar mektepter tústen keıin qujattardy múlde qabyldamaıdy.
№ 10, №26, № 34, № 43, № 44 jáne №4 jalpy bilim beretin mektepterde qyzmet alýshylarǵa qujat tapsyrmaı turyp, aldymen mektep dırektorymen nemese psıholog, ne oqý isiniń meńgerýshisimen áńgimelesý kerek degen shart qoıylǵan.
Al № 12 mektepke kelýshiler vahtadan ary qaraı óte almaıdy. Ata-analardy vahtadaǵy kezekshi «oryn joq» dep osy jerden qaıtaryp otyrǵan.
«Jasyryn satyp alýshy» qoǵamdyq baqylaýynyń nátıjesinde áshkerelengen zańbuzýshylyqtar memlekettik qyzmetshilerdiń Etıka jónindegi keńesinde qaralyp, bilim salasynyń on úsh qyzmetkeri tártiptik jaýapqa tartyldy.
