Óskemende bıyl 800-den astam adamdy ıt qapty
ÓSKEMEN. KAZINFORM – Óskemen qalasynda jyl basynan beri 826 adamdy ıt qapqan.
Osy jyldyń kókteminen beri ıt qapqan adamdar sany azaımaı otyr. Qalalyq travmatologııalyq pýnkttiń málimetinshe, medıtsınalyq kómekke júgingender sany sáýir, mamyr aılarynda jáne kúzdiń ortasynda artqan.
Qyrkúıek aıynyń ózinde dárigerler ıt qapqan 93 adamdy tirkedi. Al qazannyń ortasyna deıin medıtsınalyq mekemege taǵy 53 adam júgingen.
Dese de qazirgi ýaqytta Óskemende qaraýsyz júrgen janýarlardy turaqty túrde aýlaý jumystary júrgizilmeı otyr. Qala ákimdiginiń málimetinshe, bul qyzmet merdiger uıym anyqtalǵannan keıin ǵana iske kirisedi.
– Qazirgi ýaqytta qaraýsyz júrgen janýarlardy aýlaýmen aınalysatyn merdiger uıymdy anyqtaý boıynsha konkýrstyq rásimder áli jalǵasyp jatyr. Konkýrs aıaqtalyp, tıisti kelisimshart jasalǵannan keıin merdiger qala aýmaǵynda jumystardy dereý bastaıdy, – dep habarlady Óskemen qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminen.
Eske salsaq, buǵan deıin BQO-da janýarlardan zardap shekkender sany 1 800-den asqany habarlanǵan.
