Óskemende beınebaqylaý kameralary 12 myńnan astam buzýshylyqty tirkedi
ÓSKEMEN. QazAqparat – Óskemen qalasynda beınebaqylaý kameralary 12 myńnan astam buzýshylyqty tirkegen, dep habarlaıdy QazAqparat tilshisi.
Qalalyq Polıtsııa basqarmasy baspasóz qyzmetiniń málimetine súıensek, jyl basynan beri beınebaqylaý kameralarynyń arqasynda usaq buzaqylyq jasaǵan 3511 adam, al alkogoldi ishimdik ishkeni nemese qoǵamdyq oryndarda mas kúıde júrgeni úshin 2486 adam ákimshilik jaýapkershilikke tartyldy. Sonymen qatar jol qozǵalysy erejelerin buzǵan 6014 júrgizýshige qatysty hattama toltyrylǵan.
«Kameralardyń kómegimen osy jyldyń 9 aıynda 105 qylmys anyqtaldy. Bul – urlyq, buzaqylyq, kólikti mas kúıde aıdaý jáne esirtki zattaryn zańsyz saqtaý faktileri. Jalpy shahar boıynsha 12 myńnan astam buzýshylyq tirkelgen», - dedi basqarma bastyǵy Andreı Mýla.
Onyń aıtýynsha, bıyl jedel basqarý ortalyǵyna turǵyndardan qylmystar men oqıǵalar týraly 113 904 habarlama kelip túsken. Táýligine ortasha eseppen «102» arnasyna 300-400 aralyǵynda qońyraý soǵylady.
