Óskemende beıit tonaýshylar kóbeıgen
ÓSKEMEN. QazAqparat - Óskemendik saqshylar qala zırattaryn tonaýshylardy ustady, dep habarlaıdy QazAqparat tilshisi.
Oblystyq ishki ister departamentiniń mamandary sońǵy kezde qaladaǵy beıitterdiń tonalǵany týraly shaǵym kóbeıgenin aıtady.
Sýmaqy qoldar zırattardyń qorshaýy men syntasyna ornatylǵan metaldardy urlaýdy ádetke aınaldyrsa kerek. Osyndaı shaǵymdardyń biri boıynsha iz kesýge shyqqan qalalyq ishki ister basqarmasynyń qyzmetkerleri 24 jáne 29 jastaǵy 2 jigitti ustaǵan. Olar nysanaǵa alǵan beıitterdi tún jamylyp tonap kelgen. Búginge deıingi áreketterinen marqumdardyń týysqandary jarty mıllıon teńgege shyǵynǵa batqan.
«Ázirge olardyń 5 beıitti tonaǵany anyqtalyp otyr. Beıitten alynǵan krester men ózge de atrıbýttyq nyshandardy balqytý arqyly tústi metall qabyldaıtyn oryndarǵa satyp kelgen. Ony ózderi moıyndady. Zańsyz jolmen alynǵan metall quımalaryn qabyldap kelgen kásipkerlerge ákimshilik qaýly toltyryldy» - deıdi departamenttiń baspasóz qyzmetkeri Azamat Raısov.
Ustalǵan ekeýdiń osyǵan uqsas ózge de qylmystarǵa qatysy bar-joǵy tekserilýde. Olar kinásin moıyndasa «Urlyq» baby boıynsha 5 jylǵa bas bostandyǵynan aırylýy múmkin.
