Óskemende beıimdeý ortalyǵynan qashyp ketken 15 jasar jasóspirim tabyldy
ÓSKEMEN. QazAqparat – Óskemen qalasynda beıimdeý ortalyǵynan qashyp ketken jasóspirim tabyldy, dep habarlaıdy QazAqparat tilshisi.
Qalalyq polıtsııa basqarmasy baspasóz qyzmetiniń málimetine súıensek, «102» jedel arnasyna kámeletke tolmaǵandardy beıimdeý ortalyǵynyń tárbıeshisi habarlasqan.
41 jastaǵy áıel óz sózinde ortalyqtaǵy tárbıelenýshiniń belgisiz jaqqa qashyp ketkeni týraly aıtty.
Oqıǵa ornyna birden jedel tergeý toby kelip jetti.
«Basqarmanyń barlyq qyzmetkerleri 15 jastaǵy jasóspirimdi izdeýge jumyldyrylǵan. Sonyń nátıjesinde jarty saǵattyń ishinde tárbıelenýshiniń qaıda ekeni anyqtaldy. Balanyń aıtýynsha, ol ata-anasynyń úıine barǵysy kelgendikten beıimdeý ortalyǵynan ketip qalǵan», - dedi qalalyq PB bastyǵynyń birinshi orynbasary Oral Ryspaev.
Kámeletke tolmaǵandardy beıimdeý ortalyǵynyń tárbıeshisi jedel áreket etken tártip saqshylaryna alǵysyn aıtty.
