Óskemende balkonnan sekirmek bolǵan 39 jastaǵy er adam qutqaryldy
ÓSKEMEN. QazAqparat - Óskemende polıtseıler balkonnan sekirmek bolǵan er adamdy aman alyp qaldy, dep habarlaıdy QazAqparat.
Qala kóshelerinde ketip bara jatqan adamdar ózine qol jumsamaq bolǵan er adamdy polıtseılerdiń qalaı qutqarǵanyn taspaǵa túsirip alǵan.
17 jeltoqsan kúni saǵat 15:30 shamasynda polıtsııaǵa úshinshi qabattaǵy páterdiń balkonynan sekirmek bolǵan er adam týraly habar tústi.
Oqıǵa ornyna kóp uzamaı patrýl ekıpajy jiberildi. Patrýldik polıtsııa ınspektorlary shaqyrý túsken mekenjaıǵa bara jatyp ýchaskelik polıtsııa qyzmetkerine habarlasyp, páterdiń jalǵa berilgenin bilgen. Polıtseıler páter qojaıynymen habarlasyp, úıdi 39 jastaǵy er adamnyń 2 táýlikke jaldaǵanyn anyqtaǵan.
Oqıǵa ornynda tártip saqshylary úılesimdi jumys istedi. Qyzmetkerlerdiń biri balkonnan sekirýge jınalyp jatqan er adamdy áńgimege tartyp turǵanda, ekinshi bireý páter qojaıynymen birge ishke kirgen. Olar páterge kirgen soń áńgimesin jalǵastyryp, er adamdy mundaı jónsiz áreketten bas tartýǵa kóndirdi.
Áńgime barysynda polıtseıler sol sátti paıdalanyp, jedel áreket jasaı otyryp, ony qaýipsiz jerge súırep apardy. Osylaısha tártip saqshylary er adamnyń ómirin aman saqtap qaldy.
