Óskemende balaýyz músinder kórmesi ótip jatyr
ÓSKEMEN. QazAqparat - Óskemendegi tarıhı-ólketaný murajaıyna Sankt-Peterbor qalasynan balaýyz músinder ákelindi. Kórmedegi músinderdiń barlyǵy gıperrealızm ádisi boıynsha jasalǵan.
«Gıpperrealızm - ol nysanaǵa alynǵan zattyń syrt kózge baıqala bermeıtin tustaryn ózgertýsiz sol qalpynda sýrettelýine, bolmasa adamnyń músinin jasaǵanda ár tal shashynan bastap, betindegi ájimderine deıin aına-qatesiz somdalýyn qajet etetin óner túri bolyp sanalady», dep habarlaıdy altaynews.kz.
Bul janr sýrette de, músin jasaýda da kórinis tabady. Gıperrealızm janrymen salynǵan sýretten jaı fotosýretti ajyratý qıynǵa soǵady. Dál sol sııaqty osy ónermen jasalǵan músin de jansyz zattyń naq ózine jan bitirip, kóz aldymyzǵa jandy dúnıeni alyp keledi.
Sırek kezdesetin óner túrimen elimizden qostanaılyq Aıdos Esmaǵambetov te aınalysyp júr. Ol osy ónerdiń arqasynda Elbasynyń músinin aınymastaı etip jasap shyqqan bolatyn.
Sankt-Peterbýrgten ákelingen músinderdiń qaı-qaısyn alyp qarasańyz da olardyń jasalýyna jylǵa jeterlik ýaqyt sarp etilgen. Sonyń jemisi bolar, murajaıda turǵan barlyq músin shynaıy kórinedi.
Munda barlyq jıyny 48 balaýyz músin bar. Olardyń ishinde aty álemge áıgili saıasatkerler, tanymal tulǵalar, kıno akterleri, dúnıejúzi boıynsha rekordtar kitabyna eńgen eń alyp adam Baster Sımkýs pen boıynyń uzyndyǵy 2 metr 46 sm-ge jetetin qytaılyq Chjao Lıana men kıno akterlerinen Charlı Chaplındi kóresiz.
Kórme aqpan aıynyń segizi kúni ashyldy. Ázirge kelýshilerdiń qatary saıabyrlaǵan emes, - deıdi murajaı dırektory Jetpis Temirǵalıuly.
