Óskemende balalarǵa arnalǵan tegin sút qospasy taýsyldy
ASTANA. QazAqparat - Óskemen emhanalary tegin beriletin Similac2 qospalaryn analarǵa jazyp bermeıtin bolǵan. Óıtkeni 1 jasqa deıingi balalarǵa arnalǵan bul qospa qory taýsylǵan, al jańasyn alý úshin qaıta konkýrs ótkizý kerek. Alaıda jetkizýshiler tarapynan ótinish bolmaǵandyqtan, ondaı konkýrsty ótkizý de múmkin bolmaı tur, dep habarlaıdy altaynews.kz.
Oblystyq densaýlyq saqtaý basqarmasynan málim etkendeı, osyǵan baılanysty qazir ata-analarǵa atalǵan qospanyń ornyna «Bıolakt» aırany usynylyp otyr. Bul jaǵdaı jas analardyń narazylyǵyn týdyrýda. Olardyń kópshiligi balasy úırenip qalǵan ádettegi astan basqaǵa aýysqylary joq.
«Tender ótken joq. Balalar azyq-túligin jetkizip otyrǵan fırma jabylyp qaldy, tender ótkizbekshi bolyp tyrysqanymyzben, jetkizýshilerden ótinish bolmady. Sondyqtan tender ótkenshe, «Bıolakt» qospalary beriletin bolady», - dep túsindirdi ShQO densaýlyq saqtaý basqarmasy dári-dármek bóliminiń mamandary.
Qazaqstan Respýblıkasy densaýlyq saqtaý mınıstrliginiń 4.11. 2011j. № 786-shy buıyryǵyna saı kópuryqty júktilikpen birneshe sábı súıgen, stýdent bola júre náresteli bolǵan nemese aýyr syrqat túrlerimen aýyratyn naýqas analar óz balalaryna tegin túrde atalǵan qospalardy alýǵa quqyly.
Sala basshylarynyń aıtýynsha, týyndaǵan bul másele tek osy aıdyń 20-nan keıin ǵana sheshilýi múmkin.
Aıta ketý kerek, dál osyndaı keleńsizdik óńirde ótken jyly da bolǵan.
