Óskemende balalarǵa 1,5 mlrd teńgeden astam alıment tólenbegen
ÓSKEMEN. KAZINFORM — Óskemen qalasy turǵyndarynyń alıment boıynsha bereshegi 1,5 mlrd teńgeden asty.
Qala prokýratýrasynyń málimetine súıensek, qazirgi ýaqytta 8 899 kámeletke tolmaǵan balanyń paıdasyna alıment óndirý jóninde 6 557 atqarýshylyq is oryndalyp jatyr. Al 1 141 is boıynsha alıment beresheginiń jalpy somasy 1,5 mlrd teńgeden asqan.
Boryshkerlerdiń arasynda 214 adamnyń býkmekerlik uıymdarda tirkelgeni belgili boldy. Qazir prokýratýra olardyń alıment boıynsha bereshekti óteýge naqty múmkindigi bar-joǵyn anyqtap jatyr.
— Jekelegen atqarýshylyq ister boıynsha boryshkerlerdiń tabysy men múlkine óndirip alý sharalary qoldanylmaǵan. Sondaı-aq belgilengen shekteýlerdiń negizsiz alynyp tastalǵan faktileri anyqtaldy. Prokýrorlyq qadaǵalaý sharalarynyń nátıjesinde 13 jeke sot oryndaýshysy tártiptik jaýapkershilikke tartyldy, — delingen habarlamada.
Alıment tólemeý sebebin jumyssyzdyqpen túsindiretin boryshkerler máselesi de jeke qaralýda. Jergilikti atqarýshy organdarmen birlesip, boryshkerler úshin 19 bos jumys oryndary jármeńkesi uıymdastyrylǵan.
Eske salsaq, osyǵan deıin Jetisýda alıment tóleýden jaltarǵan 9 adam qylmystyq jaýapqa tartylǵany habarlanǵan.
