Óskemende balalardy terezeden qulaýdan saqtandyrý úshin drondar qoldanylady

ÓSKEMEN. KAZINFORM – Óskemende «sóıleıtin» drondar ashyq terezelerdiń qaýipti ekenin eskertip ushyp júr.

Sáýir aıynan beri oblysta eki bala terezeden qulap ketken. Abyroı bolǵanda, ekeýi de aman qaldy. Alaıda dene jaraqatyn alyp, em qabyldap jatyr.

Mamyr aıyndaǵy ystyqta qala turǵyndary terezelerin jıi ashyp qoıady. Dál osyndaı kúnderi balalardyń qulap ketý qaýpi artady.

Shyǵys Qazaqstan oblystyq Tótenshe jaǵdaılar departamentiniń málimetinshe, ótken jyly óńirde 8 bala terezeden qulap ketken. Onyń biri mert boldy.

Qaýipti statıstıkanyń aldyn alý úshin qutqarýshylar erekshe profılaktıkalyq sharany qolǵa aldy. Kópqabatty úılerdiń aýlasynda akýstıkalyq júıemen jabdyqtalǵan drondar ushyp júr. Olar turǵyndarǵa qaýipsizdik erejelerin daýystap eskertedi.

Ushqyshsyz ushý apparattary terezege ornatylatyn arnaıy qulyptar men bekitkishterdiń qandaı bolatynyn da kórsetti. Mundaı qurylǵylardyń ásirese kishkentaı balasy bar otbasylar úshin mańyzy zor.

- Ata-ana bir sátke basqaǵa aınalyp qalǵanda qaıǵyly jaǵdaı bolýy múmkin. Biz tek jadynama taratýmen shektelmeı, eresekterdi shyn máninde oılandyryp, balalardyń qaýipsizdigine nazar aýdartqymyz keldi, - deıdi ShQO TJD bastyǵynyń orynbasary Ishar Savazov.

Shara barysynda qutqarýshylar aqparattyq-túsindirý jumystarymen ǵana shektelmeı, az qamtylǵan jáne kópbalaly otbasylardyń úılerine terezege qorǵanysh qurylǵylaryn ornatyp berdi.

Eske salsaq, osyǵan deıin ótken jyly Qyzylorda oblysy boıynsha balalar terezeden qulap ketken 16 derek tirkelgeni habarlanǵan.