Óskemende Balalar jylyna oraı sýret kórmesi ashyldy
A.S. Pýshkın atyndaǵy oblystyq kitaphananyń uıymdastyrýymen Qazaqstandaǵy Balalar jyly aıasynda «Qylqalamdaǵy kóktem lebi» atty sýret kórmesi ashyldy. Onda QR Sýretshiler odaǵynyń múshesi Qudash Nursadyqov jetekshilik etetin balalarǵa arnalǵan «Sýret» beıneleý óneri stýdııasyna qatysýshylardyń eńbekteri kópshilik nazaryna usynyldy.
«Sýret» beıneleý óneri stýdııasy 2008 jyly ashylyp, 2015 jylǵa deıin jumys istegen. Osy ýaqyt aralyǵynda qanshama shákirt daıyndalyp, olardyń aldy joǵary oqý oryndarynyń kórkemsýret bólimderin támamdap, óner jolynda qyzmet atqarýda. 2021 jyly Qudash Dáýlethanuly memlekettik «Bala» baǵdarlamasy aıasynda «Sýret» stýdııasyn qaıta jańǵyrtýǵa múmkindik alyp, qazirgi tańda jas talanttar «Keskindeme jáne beıneleý óneri», «Qaǵaz modeldeý» baǵyttary boıynsha daǵdylaryn aqysyz jetildirýde», - delingen kitaphana qyzmetkerleri taratqan aqparatta.
Stýdııada balalarǵa aldymen beıneleý óneriniń zańdylyqtaryn, ádisterin úıretip, sodan keıin ǵana shyǵarmashylyq baǵytta taqyryptyq jumystar jasaýǵa jeteleı bastaıdy.
«Alǵash kópshilik nazaryna usynylyp otyrǵan jas sýretshilerdiń týyndylary – jyldyń eń ásem maýsymy men Ulystyń uly kúnine arnaldy. Gýash jáne maıly boıaýmen oryndalǵan ádemi shyǵarmalar kórermenge kóktemdeı shýaqty kóńil-kúı syılary sózsiz.Talantty jas sýretshiler kórmesi mamyr aıynyń sońyna deıin el nazaryna usynylady», - delingen málimette.
