Óskemende balalar qoǵamdyq kólikte tegin júredi

ÓSKEMEN. KAZINFORM – Óskemen qalasynda 18 jasqa deıingi balalar qoǵamdyq kólikte tegin júredi. 

Qalada jańa áleýmettik bastama júzege asyrylmaq.

— Balalar men 18 jasqa tolmaǵan jasóspirimderge qoǵamdyq kólikte tegin júrý múmkindigi qarastyrylyp jatyr. Bul usynysty shahar ákimi Almat Aqyshov kóterdi. Ondaǵy maqsat — bala tárbıelep otyrǵan otbasylardy qoldaý jáne oqýshylar men stýdentter úshin qolaıly jaǵdaı jasaý, — dep habarlady qala ákimdiginiń baspasóz qyzmetinen.

Qazirgi ýaqytta tıisti normatıvtik qujat ázirlenip, kelisý kezeńinen ótip jatyr.

Tegin júrý múmkindigi balanyń jasyn rastaıtyn qujatty kórsetý arqyly qoljetimdi bolady.

Eske salsaq, osyǵan deıin Almatyda 1 maýsym kúni balalarǵa metro tegin bolatyndyǵy habarlanǵan.