Óskemende balalar qoǵamdyq kólikte tegin júredi
ÓSKEMEN. KAZINFORM – Óskemen qalasynda 1 qyrkúıekten bastap 18 jasqa deıingi balalar qoǵamdyq kólikpen tegin qatynaıdy.
Mundaı sheshim qalalyq máslıhat sessııasynda qabyldandy. Qala ákimi Almat Aqyshov bul qadam áleýmettik qoldaý sharalaryn damytýǵa baǵyttalǵan keshendi baǵdarlamanyń bir bóligi ekenin atap ótti.
— Balalardyń qoǵamdyq kólikte tegin júrýi — bul bolashaqqa salynǵan ınvestıtsııa. Qalamyzdyń jas turǵyndaryn qoldaýymyz kerek, — dedi ol.
Sondaı-aq depýtattar basqa da sanattaǵy azamattarǵa jeńildik berýdi qoldady. Atap aıtqanda, 70 jastan asqandar qoǵamdyq kólikte 55% jeńildikpen júre alady. Ekinshi dúnıejúzilik soǵys ardagerleri, basqa elderdegi áskerı qımyldarǵa qatysqan ardagerler men Óskemen qalasynyń qurmetti azamattary tegin qatynaıdy.
Budan bólek, tramvaıda birinshi toptaǵy múgedekter, ekinshi toptaǵy kórý qabileti nashar jandar, «Altyn alqa», «Kúmis alqa» belgilerimen marapattalǵan kópbalaly analar, «Batyr ana» ataǵynyń ıegerleri men «Ana dańqy» ordeniniń I jáne II dárejelerimen marapattalǵan analar tegin júre alady. Osyndaı múmkindik 80 jastan asqan turǵyndarǵa da berildi.
— Bul jeńildikter egde jastaǵy azamattar men kópbalaly analar úshin naqty kómek. Biraq biz úshin eń mańyzdy sheshim — oqýshylardyń qoǵamdyq kólikte tegin júrýi bolyp otyr. Endi balalar mektepke, úıirmeler men sektsııalarǵa óz betterimen jáne qaýipsiz túrde bara alady. Otbasylyq bıýdjetke de qosymsha salmaq salynbaıdy. Sondyqtan bul bastamany biraýyzdan qoldadyq, — dedi qalalyq máslıhat depýtaty Andreı Lıverınov.
Aıta keteıik, jeńildikter úshin qalalyq bıýdjetten qarajat bólinedi.
Eske salsaq, osyǵan deıin Aqtóbede mektebi joq eldi meken balalary avtobýspen qatynaıtyndyǵy habarlanǵan.