Óskemende balabaqshalar bilim bóliminen sot arqyly 60 mln teńge óndirip aldy

ÓSKEMEN. KAZINFORM – Óskemen qalasynda jekemenshik balabaqshalar bilim bóliminen sot arqyly 60 mln teńge óndirip aldy.

Bıylǵy jazda jekemenshik balabaqshalar qabyldaý júıesindegi blokqa baılanysty balalardy ózderine qabyldaı almaı qaldy. Bul ata-analar arasynda dúrbeleń týdyrdy. Al mektepke deıingi mekemeler shyǵynǵa ushyrady. Óıtkeni balabaqshalardyń tabysy men pedagogterdiń jalaqysy ár balaǵa jan basyna shaqqandaǵy qarjylandyrýǵa baılanysty.

- Qalalyq bilim bólimi ókilderimen birneshe ret kezdesý ótkizilse de esh nátıje bolmady. Sondyqtan kásipkerlerge sotqa júginýge týra keldi, - dep habarlady ShQO kásipkerler palatasynan.

Osylaısha, 18 balabaqsha qalalyq bilim bólimin sotqa berdi. ShQO mamandandyrylǵan aýdanaralyq ekonomıkalyq sotynyń málimetinshe, sot protsesi oblystyq prokýratýra men QR Bilim mınıstrligi ókilderiniń qatysýymen barynsha ashyq júrgizildi.

- Sot áleýmettik saladaǵy kásipkerlerdi qorǵap, 60 mln teńgeden astam zalaldy óndirý talabyn qanaǵattandyrý týraly sheshim shyǵardy, - delingen habarlamada.

Eske salsaq, osyǵan deıin Jetisý oblysynda 7 jyl halyqaralyq izdeýde júrgen ýchaskelik polıtseı sottalǵany habarlanǵan.