Óskemende balabaqsha jáne mektepterdi jóndeýge 1,5 mlrd teńge bólindi

ÓSKEMEN. QazAqparat – Óskemen qalasynda osy jyly balabaqshalar men mektepterdi jóndeýge 1,5 mlrd teńge bólindi, dep habarlaıdy QazAqparat tilshisi.

ShQO ákimdiginiń málimetine súıensek, mekteptegi oryn tapshylyǵyn azaıtý úshin 2022-2025 jyldar aralyǵynda óńir boıynsha 33 bilim ordasy salynbaq. Bıyl jeti mektepti paıdalanýǵa berý josparlanyp otyr.

Aldaǵy 3 jylda Óskemenniń sol jaǵalaý bóliginde 4330 oryndyq alty mektep boı kóteredi.

«Ótken jyly oblystaǵy 11 bilim berý nysanyna 1,1 mlrd teńgege kúrdeli jáne 197 mekemege 2,8 mlrd teńgege aǵymdaǵy jóndeý júrgizildi. Onyń ishinde Óskemende 35 mektep pen 11 balabaqshany jóndeýge 1 mlrd teńgege jýyq qarajat jumsaldy. Al bıyl oblystaǵy bilim oshaqtaryn jóndeýge 1,5 mlrd teńgeden astam qarjy qarastyrylǵan», – dedi aımaq basshysy Danıal Ahmetov.

Sondaı-aq byltyr Óskemende 1417 oryndyq segiz balabaqsha ashyldy. 2022 jyly qalada 150 oryndyq «Aqbota» balabaqshasy óz jumysyn bastaǵan. Budan bólek, buryn balabaqsha bolǵan eki tıptik ǵımarat kommýnaldyq menshikke qaıtarylyp, aldaǵy ýaqytta qaıta jóndeý jumystary júrgizilmek.