Óskemende bala kóterip qaıyr tilep otyrǵan áıel jaýapqa tartyldy
Áleýmettik jelide qaladaǵy jaıaý júrginshilerge arnalǵan jolústi ótkelde qarshadaı balamen qaıyr tilep otyrǵan áıel týraly vıdeo tarady.
Jeli qoldanýshylarynyń kóbisi balanyń densaýlyǵyna alańdap, sol áıeldiń oǵan kim bolyp keletinin anyqtaý kerektigin jazyp jatty.
ShQO Polıtsııa departamentiniń málimetinshe, qazirgi ýaqytta áıel adam tabylyp, atalǵan fakti boıynsha tekseris júrgizilgen.
«Bul bala áıeldiń nemeresi ekeni anyqtaldy. Qaıyr tileýmen aınalysqan ol eki bap boıynsha, atap aıtqanda QR ÁQBtK-niń 449-babymen (qoǵamdyq oryndarda tıisý), 492-babymen (Qazaqstanda tirkeýsiz nemese jeke basyn kýálandyratyn qujatsyz turý) jaýapqa tartyldy», - delingen aqparatta.
Birinshi bap boıynsha 17 myń teńge aıyppul tóleýge mindettelse, ekinshi buzýshylyq úshin oǵan eskertý berilgen.
Al bala densaýlyǵyn tekserý úshin saraptamaǵa jiberilmek.