Óskemende ájethanada stýdent qyzdyń soqqyǵa jyǵylýyna baılanysty qylmystyq is aıaqtaldy
Naýryz aıynyń sońynda «ADK» saýda úıiniń ájethanasynda kolledjde oqıtyn boıjetken soqqyǵa jyǵylǵan bolatyn. Bul vıdeo áleýmettik jelide tarap, kóptiń qyzý talqysyna túsken edi.
Sol kezde oblystyq Polıtsııa departamenti osyǵan qatysty QR Qylmystyq Kodeksiniń 293-baby 2-bóligi (buzaqylyq) boıynsha sotqa deıingi tergeý amaldary júrgizilip jatqanyn habarlaǵan. Qyzdy soqqyǵa jyqqan mektep oqýshysynyń Óskemen qalalyq bilim bóliminde qyzmet etken anasy bul oqıǵadan keıin óz erkimen jumystan shyǵyp ketken bolatyn.
ShQO polıtsııa departamenti baspasóz qyzmetiniń málimetine súıensek, qazirgi ýaqytta kúdikti adamdarǵa qatysty QR Qylmystyq Kodeksiniń birneshe baby boıynsha qozǵalǵan qylmystyq is óndirispen aıaqtaldy.
«Protseske qatysýshylar tergeý nátıjelerimen tanystyryldy. Qylmystyq istiń zańdylyǵyn zerdeleý jáne ári qaraı sotqa joldaý máselesin sheshý úshin Óskemen qalasynyń prokýratýrasyna joldandy. Qylmystyq-protsestik kodekstiń 201-babynyń 1-bóligine sáıkes sotqa deıingi tergep-tekserýdiń ózge aqparaty jarııa etilmeıdi», - delingen habarlamada.