Óskemende áıeldi uryp-soǵyp, jyraǵa laqtyryp ketken
ASTANA. QazAqparat - Óskemende 23 mamyr kúni aýrýhanada dene jaraqattarynyń aýyrlyǵy saldarynan 28 jasar Vıktorııa Terehova qaıtys boldy. 16 mamyr kúni Prohladnaıa aýdanyndaǵy jyralardyń birinen es-túsinen aıyrylǵan jáne kóptegen dene jaraqattarymen jas áıel tabyldy, dep habarlady YK-news.kz.
Zardap shekken áıel bir apta boıyna jansaqtaý bóliminde aýyr halde jatty. Vıktorııanyń ápkesiniń sózinshe, áıeldiń denesinde kóptegen jaraqattar bolǵan jáne onyń mıy shaıqalǵan. Oǵan eki ret operatsııa jasalǵan, alaıda bul sharalar oǵan kómektese almady.
Vıktorııanyń taǵy bir týysy Olga Novolodskaıanyń sózinshe, qaıtys bolǵan áıel Ulan aýdanynyń Asý-Bulaq aýylynda atasymen jáne ájesimen birge turǵan. Oblys ortalyǵyna ol az ýaqytqa, jeke kýáligin jasatý úshin kelgen. 15 mamyr kúni keshkisin Vıktorııa ápkesine telefon shalyp, óziniń úıge kelmeıtinin jáne dostarynyń úıinde qalatynyn aıtqan.
«Maǵan ony eki úsh er azamatpen birgen kórgenderin aıtty, olardyń ekeýi aǵaıyndy jáne qaıtys bolǵan áıel olardyń úıine jıi baryp júrgen. Al úshinshisin men tanymaımyn. Kýágerler áıeldiń osy jigittermen Prohladnaıa aýdanyndaǵy dúkenderdiń biriniń mańynda otyrǵanyn kórgen. Odan ári ne bolǵanyn eshkim bilmeıdi. Kelesi kúni Vıkany osy jerdegi jyradan tapqan. Ony bireý ólimshi etip tepkilep, jyraǵa laqtyra salǵan»,-deıdi osy oqıǵaǵa qatysty óziniń oıyn bildirgen týysy Olga Novolodskaıa.
Polıtsı qyzmetkerleri qazir bolǵan oqıǵanyń mán-jaıyn anyqtaýda.
