Óskemende aıazdy kúni KamAZ órtenip ketti
ÓSKEMEN. QazAqparat - KamAZ júk kóliginen shyqqan órtti óshirmek bolǵan júrgizýshiniń denesin kúıik shaldy, dep habarlaıdy «QazAqparat» HAA tilshisi.
Júrgizýshi motor bóliginen shyqqan jalyndy óshirmekshi bolǵanda oń qolyn kúıdirip aldy. 1-2 deńgeıli kúıik alǵan júrgizýshi jedel túrde aýrýhanaǵa jetkizilip, em-dom sharalarynan keıin úıine qaıtaryldy.
TJ mamandarynyń málimetinshe, órt aýmaǵy 4 sharshy metrdi quraǵan. Órttiń sebebi retinde, qaýiptiligi joǵary agregatty saqtanbaı paıdalaný nusqasy qaralyp jatyr.
Mamandar qaýipsizdik sharalaryn taǵy da eske salady. Qys mezgilinde júrgizýshiler motor bóligin jylylaý úshin tez janatyn matalar men karton qaǵazdardy paıdalanatyny barshaǵa aıan. Atalǵan zattar motordan shyǵatyn ot ushqyndarynyń áserinen lezde tutanatynyn esten shyǵarmaǵanymyz abzal.
