Óskemende aıazda aıaldamada turǵandardy ala ketý úshin toqtaǵan júrgizýshilerge aıyppul salynbaıdy

ÓSKEMEN. QazAqparat – Óskemen qalasynda aıazda aıaldamada turǵandardy ala ketý úshin toqtaǵan júrgizýshilerge polıtsııa aıyppul salmaıtyn boldy, dep habarlaıdy QazAqparat tilshisi.

Sońǵy kúnderi Óskemende aýa raıy kúrt sýytyp ketti. Soǵan oraı keıbir kólik júrgizýshileri aıaldamada avtobýs tosyp tońyp turǵan adamdardy ala ketýdi ádetke aınaldyrdy.

Alaıda zań boıynsha aıaldamaǵa toqtaýǵa bolmaıdy.

Biraq ShQO polıtsııa departamenti túsinistik tanytyp, aıaz qaıtqanǵa deıin osyndaı júrgizýshilerge aıyppul salmaıtyndyǵyn málimdedi.

«Aıazǵa baılanysty azamattardy ala ketý úshin aıaldamaǵa toqtaǵan kólik júrgizýshileri jaýapqa tartylmaıdy. Tek olar qoǵamdyq kólikke kedergi keltirmeýi tıis», - dep habarlady departamenttiń baspasóz qyzmetinen.