Óskemende aıaldamada júregi toqtap qulap qalǵan ájeni dárigerler qutqaryp qaldy

ÓSKEMEN. KAZINFORM – Óskemen qalasynda aıaldamada otyrǵan 78 jastaǵy áje kenet júregi toqtap jerge qulap túsken. Shuǵyl jetken dárigerler ony aman saqtap qaldy.

Qart kisi aıaldamada avtobýs tosyp turǵan. Kenet ózin jaısyz sezinip, tynysy taryla bastaǵan. Kýágerler birden jádel járdemge qońyraý shaldy. Olar jetkenshe zeınetker júregi toqtap, qulap túsken. 

Dárigerler oqıǵa ornyna 8 mınýt ishinde keldi. Sol kezde qarttyń júregi toqtap qalǵanyna 4 mınýt ótken. Jedel járdem qyzmetkerleri kóshede reanımatsııalyq amaldardy jasaı bastady. Sonyń nátıjesinde klınıkalyq ólimnen keıin áıeldiń júregi qaıta dúrsildep, tynysy qalpyna keldi. 

«Bizdiń feldsherler 78 jastaǵy ájeniń júrek jumysy men ózdiginen tynys alýyn qalpyna keltirý úshin bárin jasady. Zeınetker oblystyq aýrýhananyń kardıologııalyq jansaqtaý bólimine jetkizildi. Ony kardıolog, nevropatolog, reanımatolog mamandar baqylaýyna aldy. Qazir qarttyń jaǵdaıy turaqty. №4 qalalyq aýrýhanada em qabyldap jatyr», - dep habarlady ShQO jedel medıtsınalyq járdem stantsııasynan. 

Eske salsaq, osyǵan deıin ShQO-da ata-analardyń kóbi balasyna «V» gepatıtine vaktsına saldyrýdan bas tartyp jatatyndyǵy habarlanǵan.