Óskemende avtobýstarǵa kamera ornatylmaq
ÓSKEMEN. KAZINFORM — Óskemen qalasynda avtobýstardaǵy qaýipsizdikti qamtamasyz etý úshin beınebaqylaý kameralary ornatylady.
Qazirgi ýaqytta bul baǵyttaǵy jumystar bastalyp ketken. Birneshe avtobýsqa kamera ornatylyp qoıdy. Bul kameralar Shyǵys Qazaqstan oblysy Polıtsııa departamenti jedel basqarý ortalyǵynyń júıesimen biriktirilmek.
Osylaısha, urlyq, tóbeles syndy qylmys jasalǵan jaǵdaıda polıtseıler birden kameralardyń jazbasyna qaraı alady. Bul týraly oblys ákimi Nurymbet Saqtaǵanov «ONAY» halyqqa qyzmet kórsetý ortalyǵynyń ashylý saltanatynda málim etti.
— Kameralar qaladaǵy avtobýstarǵa ornatylady. Osylaısha, tártip saqshylary quqyq buzýshylyqtarǵa jedel den qoıyp, qoǵamdyq kóliktegi qaýipsizdik deńgeıi artady, — dedi ol.
Eske salsaq, buǵan deıin Óskemende jumys ýaqytynyń bir saǵatqa keri shegerilýi qoǵamdyq kólikterdiń júrý kestesine ózgeris ákelmeıtindigin jazǵanbyz.